Aruba Basketball Bond a trece coach Antonio D Albero pa yuda nos muchanan den basketball


Aruba Basketball Bond a trece coach Antonio D Albero pa yuda nos muchanan den basketball

Mayoria federacion deportivo ta traha cu un vision cu e unico meta pa hiba nan deporte na un otro nivel. Pa haci esaki mester traha riba un bon base y percura pa e desaroyo sigui den e forma mas positivo unda lo amplia e conocemento den e deporte. Un di e federacionnan cu ta trahando duro na bienestar di nan atletanan ta Aruba Basketball Bond kende recientemente a contrata un coach profesional procedente di Italia, coach Antonio D’albero.

Coach D’albero lo permanece na Aruba for di 15 november te cu 16 december. Coach Antonio D’albero no ta desconoci na Italia y a traha cu ekiponan profesional di basketball di hende muhe y hende homber. Na banda di esaki e la coach ekiponan na Italia mes como tambe na Dinamarca, Merca y Luxemburg. Tambe coach D’albero a traha cu e seleccion nacional di Macedonia U-20, Jamaica.

Un di e tareanan principal di Coach D’albero ta pa analisa nos hungadonan di basketball, tambe e lo prepara y entrena e seleccion nacional U-16 cu den 2016 tin un compromiso den e Caribbean Basketball Confederation U-16 Competition. Por ultimo e lo yuda nos coachnan den nan trabou cu nan hungadonan como tambe intercambia ideanan pa e mehoracion di basketball na Aruba.

Un danki sigur na Lotto, e Loteria di Aruba pa medio di Comision di Subsidio cu a subsidia e federacion di basketball pa asina por a adkiri un coach profesional di Italia pa yuda engrandece e deporte di basketball na Aruba.
Cumprando weganan di Lotto, e Loteria di Aruba bo ta contribui na deporte riba nos isla. Meta di e fundacion ta pa organisa loteria, cambia bida di su hungadonan y na mes momento inverti den deporte local pa medio di donacionnan na e comision di subsidio.